زجل يا اللى عندك مال

يا اللى عندك مال وخايف تدِّى مِنُّه للفقير
ده الغنا فـ الدنيا زايف مهما ملكك كان كبير
ده الفقير أبسط حقوقه الغنى يعطف عليه
والشبع يجرى فـ عروقه والأمان يسكن عنيه
قسمته فـ الفقر يغرق ينطحن وسط الهموم
وإنت تاكل لمَّا تشرق وفـ نعيم الله تعوم
لو تسيبه بكره يسرق لقمته وذنبه عليك
قبل نار ربَّك ما تحرق جتته حتطول إيديك
حكمته نارك فى إيده وجنتك شوف إيه تعوز
اللىِّ يعطف راح يزيده وآخرته بالخير يفوز
خلى عقلك وسط راسك قبل نومتك فى التراب
لو صحيح عايز خلاصك مهما ملكك زاد سراب
مش هتاخد حاجة مِنُّه تسندك يوم الزِّحام
غير سؤال فى الآخرة عنه من حلال أو من حرام
دنيتك لو يوم تقوملك كل شىء فى الدنا فانى
إن عملت الخير يدوملك وإن بخلت إنت اللى جانى

أشرف عطية محمد البلتاجى

رابطة الزجالين وكتاب الأغانى